អ្វីទៅជាការប្រកួតវាយអត្ថបទយូនីកូដ

ព្រឹត្តិការណ៍ដ៏អស្ចារ្យ

ការប្រកួត

វាយអត្ថបទយូនីកូដខ្មែរដណ្ដើមជើងឯកទូទាំងប្រទេស

រៀបចំដោយ ៖

កាលបរិច្ឆេទប្រកួតថ្នាក់ខេត្ត/ក្រុង ៖

ចាប់ផ្តើម ៖ ថ្ងៃទី ១៣ ខែ វិច្ឆិកា ឆ្នាំ ២០០៦
បញ្ចប់ ៖ ថ្ងៃទី ០៨ ខែ ធ្នូ ឆ្នាំ ២០០៦

កាលបរិច្ឆេទប្រកួតថ្នាក់ជាតិ ៖

ថ្ងៃទី ១៨ ខែ ធ្នូ ឆ្នាំ ២០០៦

រង្វាន់ជ័យលាភី

ការប្រកួតថ្នាក់ខេត្ត/ក្រុង

ការប្រកួតថ្នាក់ជាតិ

វិញ្ញាសាទី១

ប្រកួតតាមកម្មវិធី

រៀនវាយយូនីកូដខ្មែរ

ជ័យលាភីលេខ១ ៖ ១២០.០០០,០០៛

ជ័យលាភីលេខ២ ៖ ៨០.០០០,០០៛

ជ័យលាភីលេខ៣ ៖ ៤០.០០០,០០៛

ជ័យលាភីលេខ១ ៖ ៨០០.០០០,០០៛

ជ័យលាភីលេខ២ ៖ ៤០០.០០០,០០៛

ជ័យលាភីលេខ៣ ៖ ២០០.០០០,០០៛

វិញ្ញាសាទី២

ប្រកួតតាមកម្មវិធី

ការិយាល័យភាសាខ្មែរ

ជ័យលាភីលេខ១ ៖ ២៨០.០០០,០០៛

ជ័យលាភីលេខ២ ៖ ១២០.០០០,០០៛

ជ័យលាភីលេខ៣ ៖ ៨០.០០០,០០៛

ជ័យលាភីលេខ១ ៖ ២.០០០.០០០,០០៛

ជ័យលាភីលេខ២ ៖ ១.២០០.០០០,០០៛

ជ័យលាភីលេខ៣ ៖ ៨០០.០០០,០០៛

ជ័យលាភីលេខ៤ ៖ ៤០០.០០០,០០៛

ជ័យលាភីលេខ៥ ៖ ២០០.០០០,០០៛

អ្វីទៅជាការប្រកួតវាយអត្ថបទយូនីកូដខ្មែរ ?

ការប្រកួតវាយអត្ថបទយូនីកូដខ្មែរ គឺជាការប្រកួតថ្នាក់ជាតិមួយដែលអ្នកចូលរួមប្រកួតគ្រប់រូប ត្រូវប្រកួតវាយអត្ថបទតាមក្បួនយូនីកូដខ្មែរ និង រៀបចំឯកសារអត្ថបទដោយប្រើប្រាស់កម្មវិធីកុំព្យូទ័រភាសាខ្មែរ ។ ជាពិសេស គឺធ្វើការប្រកួតទៅលើល្បឿនក្នុងការវាយអត្ថបទភាសាខ្មែរ ដោយប្រើប្រាស់ពុម្ពអក្សរយូនីកូដខ្មែរ និង ល្បឿនក្នុងការរៀបចំឯកសារអត្ថបទការិយាល័យសាមញ្ញមួយបានទាន់ពេលវេលា ។

ការប្រកួតនេះ នឹងត្រូវប្រារព្ធធ្វើឡើងនៅតាមបណ្ដាខេត្ត/ក្រុងនានានៃប្រទេសកម្ពុជា ។ ចំណែកឯការប្រកួតថ្នាក់ជាតិវិញ នឹងត្រូវធ្វើឡើងនៅទីក្រុងភ្នំពេញ ដោយមានការចូលរួមប្រកួត ពីអ្នកដែលទទួលបានជ័យលាភីលេខ ១ លេខ ២ និង លេខ ៣ ពីការប្រកួតថ្នាក់ខេត្ត/ក្រុង ។

ការប្រកួតនេះសហការរៀបចំឡើងដោយ អាជ្ញាធរជាតិទទួលបន្ទុកកិច្ចការអភិវឌ្ឍន៍ បច្ចេកវិទ្យា គមនាគមន៍ ព័ត៌មានវិទ្យា (NiDA) និង អង្គការវេទិកាទូទៅនៃកម្ពុជា ។

គោលបំណងនៃការប្រកួត

គោលបំណងនៃការប្រកួត គឺធ្វើឡើងដើម្បីជម្រុញនិងលើកទឹកចិត្តឲ្យអ្នកប្រើប្រាស់កុំព្យូទ័ររៀនវាយអត្ថបទភាសាខ្មែរដោយប្រើប្រាស់ពុម្ពអក្សរយូនីកូដខ្មែរ និងកម្មវិធីការិយាល័យភាសាខ្មែរ ដើម្បីរៀបចំឯកសារអត្ថបទ និង សៀវភៅបញ្ជី ឲ្យបានទាន់ពេលវេលា ។ ប្រសិនបើមានការជម្រុញ និងលើកទឹកចិត្តគ្រប់គ្រាន់ដល់អ្នកប្រើហើយនោះក្រុមហ៊ុន និងអ្នកផ្គត់ផ្គង់នានា (ដូចជា ហាងលក់កុំព្យូទ័រ ហាងអ៊ីនធឺណិតវិទ្យាស្ថានបណ្ដុះបណ្ដាល ស្ថាប័ន និង អង្គភាពនានា) នឹងធ្វើការដំឡើងយូនីកូដខ្មែរ និងកម្មវិធីកុំព្យូទ័រភាសាខ្មែរ ដល់អតិថិជន និងបុគ្គលិករបស់ខ្លួន ហើយសិស្ស និស្សិត នឹងមករៀនប្រើប្រាស់កម្មវិធីកុំព្យូទ័រភាសាខ្មែរ ដើម្បីអាចចូលរួមប្រកួតវាយអត្ថបទតាមយូនីកូដខ្មែរនេះផងដែរ ។ ហាងអ៊ីនធឺណិត កន្លែងបោះពុម្ព និង មជ្ឈមណ្ឌលបណ្ដុះបណ្ដាលនានា នឹងចាប់អារម្មណ៍ទៅលើការបង្កើតសេវាកម្មបណ្ដុះបណ្ដាលកម្មវិធីកុំព្យូទ័រភាសាខ្មែរ និង យូនីកូដខ្មែរ ដើម្បីស្វែងរកប្រាក់ចំណូលបន្ថែមទៀត ។

NiDA និង អង្គការវេទិកាទូទៅនៃកម្ពុជា នឹងគាំទ្រគ្រប់មជ្ឈមណ្ឌលបណ្ដុះបណ្ដាល អង្គការក្រៅរដ្ឋាភិបាល ហាងអ៊ីនធឺណិត និង ក្រុមហ៊ុននានា ដោយផ្ដល់ជាសេវាកម្មបង្រៀន និង ដំឡើងកម្មវិធីកុំព្យូទ័រភាសាខ្មែរនេះ នៅគ្រប់ទីកន្លែងទូទាំងប្រទេសដោយឥតគិតថ្លៃ ។

ការប្រកួត

ការប្រកួតនេះចែកចេញជាពីរ គឺ ៖

លក្ខណៈបុគ្គល ៖ បុគ្គលគ្រប់រូបអាចចូលរួមប្រកួតដោយសេរី ។
លក្ខណៈក្រុម ៖ អ្នកចូលរួមប្រកួតត្រូវបង្កើតក្រុមមួយដែលមានសមាជិក ៣ រូបសម្រាប់ចូលរួមប្រកួត ដោយដាក់ឈ្មោះសម្គាល់ក្រុមតាមតម្រូវការរបស់ខ្លួន ។

ការប្រកួតមានពីរដំណាក់កាល គឺ ៖

ដំណាក់កាលទី១ ៖ ការប្រកួតថ្នាក់ខេត្ត/ក្រុង
ដំណាក់កាលទី២ ៖ ការប្រកួតថ្នាក់ជាតិ

ដំណាក់កាលនីមួយៗ មានពីរវិញ្ញាសាដូចគ្នា គឺ ៖

វិញ្ញាសាទី១ ៖ វាយអត្ថបទតាមកម្មវិធី រៀនវាយយូនីកូដខ្មែរ រយៈពេល ៥នាទី ។
វិញ្ញាសាទី២ ៖ រៀបចំឯកសារអត្ថបទដោយប្រើ កម្មវិធីការិយាល័យភាសាខ្មែរ រយៈពេល ១៥នាទី ។ការចូលរួមប្រកួត

ពុំតម្រូវឲ្យមានការដាក់ពាក្យចូលរួមប្រកួតជាមុនឡើយ ។
បេក្ខជន/បេក្ខនារី ត្រូវមកចូលរួមប្រកួតតាមខេត្ត/ក្រុង ដែលខ្លួនកំពុងរស់នៅតាមកាលបរិច្ឆេទ និងទីកន្លែងប្រកួតដែលបានកំណត់ ដោយគ្រាន់តែភ្ជាប់មកជាមួយនូវអត្តសញ្ញាណប័ណ្ណ ឬ ប័ណ្ណសម្គាល់ខ្លួនសិស្ស និស្សិត បុគ្គលិក ។

បេក្ខជន/បេក្ខនារីនឹងត្រូវចូលរួមប្រកួតនៅក្នុងពេលដំណាលគ្នា ទាំងជាលក្ខណៈបុគ្គល និង ជាលក្ខណៈក្រុម ។
បុគ្គលិកទាំងអស់របស់ អាជ្ញាធរជាតិទទួលបន្ទុកកិច្ចការអភិវឌ្ឍន៍ បច្ចេកវិទ្យា គមនាគមន៍ ព័ត៌មានវិទ្យា (NiDA) និង អង្គការវេទិកាទូទៅនៃកម្ពុជាពុំត្រូវបានអនុញ្ញាតឲ្យចូលរួមប្រកួតឡើយ ។

ការប្រកួតជាលក្ខណៈក្រុម

គ្រប់មហាវិទ្យាល័យ វិទ្យាស្ថាន ហាងអ៊ីនធឺណិត មជ្ឈមណ្ឌលបណ្ដុះបណ្ដាល ស្ថាប័ន និង អង្គភាពនានា ឬ ក្រុមមិត្តភក្ដិទាំងឡាយ អាចជ្រើសរើសសមាជិកចំនួន ៣ នាក់ សម្រាប់បង្កើតជាក្រុមផ្ទាល់ខ្លួនមួយ ដើម្បីចូលរូមប្រកួតដណ្ដើមជើងឯកជាលក្ខណៈក្រុម ។ សម្រាប់ព័ត៌មានបន្ថែមអំពីការប្រកួតជាលក្ខណៈក្រុមសូមមើលក្នុងតំបន់បណ្ដាញ ៖ www.khmeros.info/contest ។

លក្ខខណ្ឌនៃការប្រកួត

ត្រូវចេះវាយអត្ថបទផ្សេងៗ តាមក្បួនយូនីកូដខ្មែរ ។

ត្រូវចេះមូលដ្ឋានគ្រឹះនៃកម្មវិធីការិយាល័យភាសាខ្មែរ (OpenOffice 2.0) ។
ត្រូវមានប័ណ្ណសម្គាល់ខ្លួន ឬ អត្តសញ្ញាណប័ណ្ណ បង្ហាញមុនពេលប្រកួត ។
អ្នកឈ្នះការប្រកួតថ្នាក់ខេត្ត/ក្រុងក្នុងវិញ្ញាសាទី១ នឹងត្រូវអនុញ្ញាតឲ្យប្រកួតវិញ្ញាសាទី២ ជាបន្តទៀត ។
អ្នកទទួលបានចំណាត់ថ្នាក់លេខ ១ លេខ ២ និង លេខ ៣ ក្នុងវិញ្ញាសាទី២ នៃការប្រកួតថ្នាក់ខេត្ត/ក្រុង នឹងត្រូវអនុញ្ញាតឲ្យប្រកួតថ្នាក់ជាតិនៅភ្នំពេញ ។
អ្នកឈ្នះការប្រកួតថ្នាក់ជាតិក្នុងវិញ្ញាសាទី១ នឹងត្រូវអនុញ្ញាតឲ្យប្រកួតវិញ្ញាសាទី២ ជាបន្តទៀត ។
អ្នកឈ្នះការប្រកួតក្នុងវិញ្ញាសាទី២ នៃការប្រកួតថ្នាក់ជាតិ នឹងក្លាយជាជើងឯកក្នុងការប្រកួតវាយអត្ថបទយូនីកូដខ្មែរដណ្ដើមជើងឯកទូទាំងប្រទេស ថ្នាក់ជាតិប្រចាំឆ្នាំ ២០០៦ ។

រង្វាន់ជ័យលាភី

រង្វាន់រួមមាន ៖ ប្រាក់សុទ្ធ និង វត្ថុអនុស្សាវរីយ៍ជាច្រើនទៀត ។
អ្នកទទួលជ័យលាភីក្នុងការប្រកួតថ្នាក់ខេត្ត/ក្រុង និង ការប្រកួតថ្នាក់ជាតិ ទាំងអស់ នឹងទទួលបានរង្វាន់ភ្លាមៗ បន្ទាប់ពីចប់ការប្រកួតនីមួយៗ ព្រមទាំងទទួលបានលិខិតសរសើរមួយច្បាប់ ពីការប្រកួតនេះផងដែរ ។
អ្នកទទួលបានចំណាត់ថ្នាក់ លេខ ១ លេខ ២ និង លេខ ៣ ក្នុងវិញ្ញាសាទី២ នៃការប្រកួតថ្នាក់ខេត្ត/ក្រុង នឹងទទួលបានប្រាក់ឧបត្ថម្ភសម្រាប់ថ្លៃធ្វើដំណើរទៅមក ព្រមទាំងការស្នាក់នៅហូបចុករយៈពេល ២ថ្ងៃ ក្នុងកំឡុងពេលមកប្រកួតវគ្គផ្ដាច់ព្រ័ត្រថ្នាក់ជាតិនៅរាជធានីភ្នំពេញ ។

លក្ខខណ្ឌនៃការប្រកួតជាក្រុម

អ្នកចូលរួមប្រកួតមានសិទ្ធិបង្កើតក្រុមដែលមានសមាជិកចំនួន៣រូប ក្រុមនីមួយៗត្រូវបង្កើតឈ្មោះសម្គាល់ក្រុមរបស់ខ្លួនតាមតម្រូវការ ។
ពេលចុះឈ្មោះប្រកួត ប្រសិនបើបេក្ខជន ឬបេក្ខនារី មានក្រុម ត្រូវបំពេញឈ្មោះសម្គាល់ក្រុមរបស់ខ្លួនឲ្យបានត្រឹមត្រូវ ។
ក្រុមដែលទទួលជ័យលាភី គឺត្រូវបានជ្រើសចេញពីការប្រកួតលក្ខណៈបុគ្គលក្នុងវិញ្ញាសាទី២ គឺយើងយកពិន្ទុនៃការប្រកួតលក្ខណៈបុគ្គល នៃសមាជិកក្នុងក្រុមបូកបញ្ចូលគ្នា ។
ក្រុមដែលមានពិន្ទុសរុបខ្ពស់ជាងគេក្នុងវិញ្ញាសាទី២ នៃការប្រកួតថ្នាក់ខេត្ត/ក្រុង នឹងត្រូវមកធ្វើការប្រកួតថ្នាក់ជាតិនៅភ្នំពេញបន្តទៀត ។
ចំពោះការប្រកួតថ្នាក់ជាតិជាលក្ខណៈក្រុម គឺមិនមានប្រកួតវិញ្ញាសាទី១ទេ គឺត្រូវប្រកួតវិញ្ញាសាទី២តែម្ដង ។
ក្រុមដែលមានពិន្ទុសរុបខ្ពស់ជាងគេក្នុងវិញ្ញាសាទី២ នៃការប្រកួតថ្នាក់ជាតិនឹងក្លាយជាក្រុមជើងឯកវាយអត្ថបទតាមយូនីកូដខ្មែរទូទាំងប្រទេស ។

ទីកន្លែងប្រកួត

សូមស្វែងរកអាសយដ្ឋានប្រកួតថ្នាក់ខេត្ត/ក្រុង នៅតាមបណ្ដាហាងអ៊ីនធឺណិតស្ថាប័នរដ្ឋ និង ឯកជន មជ្ឈមណ្ឌលបណ្ដុះបណ្ដាល សាលារៀន វិទ្យាស្ថាន មហាវិទ្យាល័យនានា ដែលមានបិទប័ណ្ណប្រកាស នៅក្នុងខេត្ត/ក្រុងដែលអ្នកកំពុងរស់នៅ ឬ ក្នុងតំបន់បណ្ដាញ www.khmeros.info/contest ។
ការប្រកួតថ្នាក់ជាតិ គឺធ្វើឡើងនៅបន្ទប់ អ៊ីនធឺណិតផ្លាស្សា របស់អាជ្ញាធរជាតិទទួលបន្ទុកកិច្ចការអភិវឌ្ឍន៍ បច្ចេកវិទ្យា គមនាគមន៍ ព័ត៌មានវិទ្យា (NiDA) ដែលមានទីតាំងស្ថិតនៅក្នុងបរិវេណទីស្ដីការគណៈរដ្ឋមន្ត្រី តាមបណ្ដោយមហាវិថីសហព័ន្ធរុស្សី រាជធានីភ្នំពេញ ។

ការប្រកួតចាប់ផ្តើមពីម៉ោង ៨:០០ ព្រឹក ដល់ម៉ោង ១២:០០ ថ្ងៃត្រង់

វិញ្ញាសាទី១ ៖ ពីម៉ោង ៨:០០ ដល់ ម៉ោង ១០:០០ ព្រឹក
វិញ្ញាសាទី២ ៖ ពីម៉ោង ១០:២០ ដល់ ម៉ោង ១២:០០ ថ្ងៃត្រង់

សម្រាប់ព័ត៌មានបន្ថែមសូមទំនាក់ទំនងតាម ៖

អ៊ីមែល ៖ training@khmeros.info

ទូរស័ព្ទ ៖ ០២៣ ៣៦០៣៤៥