គម្រោងកម្មវិធីកុំព្យូទ័រភាសាខ្មែរ

ក្រុម​ KhmerOS ​បាន​ធ្វើការបណ្ដុះបណ្ដាល​គ្រូបង្រៀនកម្មវិធីកុំព្យូទ័រភាសាខ្មែរ នៅទីក្រុងប៉ៃលិន​។​ ប៉ៃលិន គឺជាទីក្រុងមួយរបស់ប្រទេសកម្ពុជា ដែលស្ថិតនៅភាគពាយ័ព្យនៃប្រទេស និងមានព្រំប្រទល់​ជាប់ប្រទេសថៃ។​ វគ្គបណ្ដុះបណ្ដាល​មានរយៈពេល ៣ថ្ងៃ គឺ​ចាប់ពីថ្ងៃទី ១៥ ដល់ ១៧ ខែ​ កុម្ភៈ ឆ្នាំ ២០០៦ ។ យើង​បាន​បញ្ចូន​គ្រូបង្គោលនៃ​ក្រុម KhmerOS ចំនួន ២ នាក់ សម្រាប់​បង្រៀន​វគ្គបណ្ដុះ​បណ្ដាល​នេះ ។ វគ្គបណ្ដុះបណ្ដាល​នេះ​មានរយៈ​ ២៤ ម៉ោង និង ​​ត្រូវបានបណ្ដុះបណ្ដាល​​លើ​កម្មវិធី​​ដូចជា ៖ ស្លឹករឹត នព្វន្ដ ពិព័រណ៍ មេខលា មយូរា ព្រមទាំងរបៀបវាយយូនីកូដខ្មែរ និង ណែនាំអំពី​របៀបនៃ​ការដំឡើង​​កម្មវិធី​ភាសាខ្មែរផ្សេងៗ ជាដើម ។

កំណែដំបូងនៃ សៀវភៅ​មគ្គុទ្ទេសក៍​អ្នកប្រើ កម្មវិធីការិយាល័យ ជាភាសាខ្មែរ ដែលបង្កើត​ឡើង​ដោយ​ក្រុម​ KhmerOS នឹង​ចេញ​នៅ​ពេល​ឆាប់ៗ​នេះ។
ក្នុងសៀវភៅនេះរួមមាន ៖
. កម្មវិធី ស្លឹករឹត
. កម្មវិធី​ នព្វន្ត
. កម្មវិធី ពិព័រណ៍